Lè nou kòmanse li liv sa a, nou pa wè li sanble yon lèt menm. Se nan dènye fraz yo nou santi se yon lèt ki nan men nou. Daprè sa ki nan lèt la, se yon lèt yo te voye bay yon gwoup jwif ki te kretyen. Men, yo sitèlman jwenn jwif parèy yo k ap pase yo nan betiz, k ap joure, ki pa t vle wè yo, yo ta vle pèdi konfyans yo gen nan Kris la pou yo tounen nan ansyen relijyon yo a. Lèt sa a se yon ankourajman pou jwif ki te fè yo kretyen, pou moutre yo ki jan Kris la pi bon lontan pase lalwa Moyiz la. Se li menm Kris la ki fè nou konnen ki moun Bondye ye. Koze ki nan twa premye vèsè premye chapit la se li ki tout liv la.
Men kijan koze a devlope.
Pou kòmanse, Jezi se pitit Bondye depi tout tan. Li toujou fè volonte papa l. Avèk soufrans lapenn li sipòte yo, li fè nou wè sa ki rele obeyi Bondye. Konsa li pi fò pase yo tout, pase pwofèt Bonye yo, pase zanj yo ki mesaje Bondye yo, pase Moyiz ak Jozye, pi fò pase ata pè ansyen kontra yo paske Bondye deklare Jezi pè depi tout tan ak pou tout tan.
Avèk li, Bondye pase yon lòt kontra. Ofrann li fè bay Bondye a pi bon pase ofrann towo ak kabrit yo te konn fè anvan an, paske se tèt pa li menm li ofri.
Lèfini se li menm ankò, granprèt ki la pou tout tan an, ki fè sèvis la. Tout moun ki mete konfyans yo nan li delivre anba peche ak anba lanmò, yo pa pè anyen ankò. Se konsa yo jwenn nan men Kris la delivrans tout bon an. Tout sèvis ak tout ofrann bèt yo te konn fè dapre ansyen kontra a, se tankou pòtre ki te la pou ban nou davans yon lide sou sa ki ta pral rive apre a. Paske se sèlman konfyans nan Bondye ki pèmèt yon moun resevwa delivrans sa a. Istwa jwif yo plen egzanp ki moutre jan konfyans nan Bondye se bagay ki konsekan anpil.
Se poutèt sa moun ki mete konfyans yo nan Jezi se pou yo ankouraje, se pou yo kenbe fèm jouk sa kaba. Ak je yo kole sou Jezi, se pou yo mare ren yo pou yo ka sipòte tout kalite soufrans ak pèsekisyon ki ka tonbe sou yo.
Bib la, Edisyon 1999
TOTAL: 25 liv | 213 chapit | 6679 vèsè
 |
| Depi 1 fevriye 2021 Senmak, Ayiti Telefòn: (509) 4075-6250 Imèl: etidbiblikpesonel@gmail.com Blog: www.etidbiblikpesonel.blogspot.com |
Aucun commentaire:
Enregistrer un commentaire