ENTWO Travay

 

Liv Travay la te ekri ant lane 63 ak 70 aprè Jezikri. Li gen 28 chapit ak 1007 vèsè. 

Liv Travay apot yo mache avèk liv Bon Nouvèl Lik la. Se dezyèm pòsyon travay Lik la. Ladan l, li rakonte sa ki pase apre Jezi monte nan syèl la, ki jan avèk lasistans Lespri Bondye premye patizan Jezi yo mache gaye Bon Nouvèl la depi lavil peyi jwif yo rive lavil Antyòch nan peyi Siri. 

Apre sa, avek Pòl, Bon Nouvèl Kris la gaye nan tout zòn Ti Lazi a, li fè chemen l nan peyi Lagrès jouk li rive lavil Wòm, ki lè sa a te sèl kòk chante nan tout zòn lan. Se konsa li rakonte nou kijan sosyete patizan Kris la kòmanse nan mitan jwif yo, li gaye jouk li rive louvri bra l sou latè. Liv la montre patizan Kris yo pa t soti ni pou fè dezòd nan peyi a, ni pou yo monte tèt moun sou gouvènman wa lavil Wòm lan. Mesay Kris la pa t vin ni pou kraze ni pou pran plas relijyon jwif yo osinon okenn lòt relijyon yo, men li vin bay yon satisfaksyon yo tout t ap chache bay, men yo youn pa t ka rive bay.

Nan tout moun k ap mache fè travay sa a, gen de ladan yo ki kanpe apa : se Pyè ak Pòl. Men pou di vre, moun ki responsab tout bon pou travay k ap fèt la se Sentespri Bondye a. Se li menm avèk pouvwa li, avèk asistans li, k ap dirije tout bagay. Se li k ap bay patizan Kris yo fòs kouray ak tèt ansanm nan tout sikonstans. Se li menm ki fè legliz la boujonnen toupatou sou latè, paske legliz la se yon sosyete Jezi li menm òganize, se li menm tou ki kenbe l la pou tout tan.

Nou ta ka separe Liv Travay apot yo fè twa pòsyon :

⦁ Kòmansman Legliz la nan lavil Jerizalèm

⦁ Legliz la gaye nan rès peyi Lapalestin lan

⦁ Legliz la gaye nan tout peyi ki bò lanmè Mediterane a, jouk li rive lavil Wòm. 

Men plan liv la

⦁ Patizan Kris yo ap tann Sentespri a

⦁ Dènye lòd Jezi ba yo ak pwomès li fè yo (1.1-14)

⦁ Yo mete yo lòt moun nan plas Jida (1.15-26)

⦁ Travay patizan Kris yo lavil Jerizalèm (2.1-8.3)

⦁ Travay patizan Kris yo nan peyi Jide ak nan peyi Samari (8.4-12.25)

⦁ Travay Pòl (13.28)

⦁ Premye vwayaj li (13-14)

⦁ Gwo reyinyon lavil Jerizalèm lan (15.1-35)

⦁ Dezyèm vwayaj li (15.36-18.22)

⦁ Twazyèm vwayaj li (18.23-21.16)

⦁ Pòl prizonye lavil Jerizalèm, lavil Sezare ak lavil Wòm (21.17-28.31)

Sous: Bib la, Edisyon 1999

TOTAL: 20 liv | 170 chapit | 5680 vèsè

Depi 1 fevriye 2021
Senmak, Ayiti
Telefòn: (509) 4075-6250
Imèl: etidbiblikpesonel@gmail.com 
Blog: www.etidbiblikpesonel.blogspot.com