Se bagay sèten, liv bòn nouvèl Jan an te ekri lontan apre lòt twa liv yo, atout nou pa ka di ki dat yo te ekri l. Men kou ou kòmanse li liv la ou wè li pa fin menm ak lòt yo, menm lè l ap rakonte sa lòt yo rakonte tou. Li bay anpil ti detay nou pa jwenn nan okenn lòt twa liv bòn nouvèl yo, tankou rankont Jezi fè ak Farizyen yo ak vizit moun peyi Lagrès yo te vin rann li. Se sèl liv sa ki rakonte dènye fwa Jezi te fè patizan l yo wè l bò lanmè Galile a, ak jan li te bay Pyè chans repare sa l te fè jou lannwit jedi pou louvri vandredi anvan l al mouri a.
Men sa ki mete liv sa a apa pa rapò ak lòt yo: li pa sòti pou l bay twòp detay sou sa Jezi fè, men li vle fè konnen ki kalite moun li ye. Depi nan premye koze a li kanpe Jezi tankou pawòl Bondye ki la depi tout tan, ki vin moun, ki vin viv nan mitan moun sou latè. Mirak li fè yo, se sa ki fè nou wè se pitit Bondye tout bon li ye. Lè Jezi ap pale pou l esplike sans mirak li yo, li sèvi ak anpil pawòl, tankou dlo ki bay lavi a, pen ki soti nan syèl la, limyè ki klere tout moun lan, pou fè kalite kado Bondye Bay tout moun, ki vle di lavi ki p ap janm fini an. Kado sa a nou ka resevwa l depi kounyeya sou latè depi nou aksepte Jezi pou chemen an verite a ak lavi a.
Pran chapit trèz rive chapit disèt, li bay anpil detay konsekan sou dènye ti tan Jezi pase ansanm ak patizan l yo jou lannwit yo te arete l la, bèl lapryè li te fè pou yo nan pye Bondye ak bon pawòl ankourajaman li te di yo pou l te pare yo pou sa ki ta pral rive l nan jounen vandredi an.
Se nan liv sa nou jwenn non pawòli li Jezi bay tèt li: se mwen ki pen ki bay lavi a, limyè tout moun sou latè, pòtay pak mouton, bon gadò a. Se mwen ki gen pouvwa pou leve moun ki mouri deja yo pou m ba yo lavi ankò. Se mwen ki chemen an, verite a ak lavi a, lavi tout bon an.
Nan fen liv la, yo di nou liv la te ekri pou moun ki va li l ka rive kwè Jezi se moun Bondye te pwomèt li t ap voye pou delivre moun sou latè. Depi yon moun mete konfyans li nan Jezi, li gen lavi.
Plan liv la
⦁ Premye koze (1.118)
⦁ Jan Batis ak premye disip Jezi yo (1.19-51)
⦁ Travay Jezikri nan mitan pèp la (2-12)
⦁ Dènye jou li pase lavl Jerizalèm (13-19)
⦁ Jezi leve soti vivan, li fè patizan l yo wè l (20-21)
Bib la, Edisyon 1999
TOTAL: 26 liv | 234 chapit | 7558 vèsè
 |
| Depi 1 fevriye 2021 Senmak, Ayiti Telefòn: (509) 4075-6250 Imèl: etidbiblikpesonel@gmail.com Blog: www.etidbiblikpesonel.blogspot.com |
Aucun commentaire:
Enregistrer un commentaire