ENTWO Women

Pòl te fè lide pase vizite manm legliz ki lavil Wòm lan sou wout li pou peyi Lespay. Li ekri yo lèt sa a pou l esplike yo kijan li menm li konprann kalite konfyans kretyen yo gen nan Bondye  ak jan pou yo mennen lavi yo. Paske, konfyans sa a se pa t bèl pawòl  nan bouch ase. Se pou yo viv li nan tout sa y ap fè. Se konsa nou jwenn nan liv sa a tout sa Pòl te mete nan lèt pou moun Galasi yo, men fwa sa a ak plis detay.

Lè li fin voye bèl bonjou pou tout moun ki nan legliz lavil  Wòm lan, li di yo jan li pa manke lapriyè pou yo. Aprè sa, li bay gwo koze ki chita nan mitan lèt la : Bòn Nouvèl Jezikri a fè nou konnen ki jan Bondye fè moun gras . Travay sa a kòmanse ak konfyans moun gen nan Bondye, li fini nan menm konfyans sa a tou.

Epi Pòl louvri sou koze a. Dènye  moun sou latè, kit jwif yo, kit moun lòt nasyon yo, yo tout bezwen byen ak Bondye ankò, paske yo tout anba chenn peche a, yo tout anba menm kondanasyon an. Men, se sèlman lè moun mete tout konfyans  yo  nan  Bondye  Bondye ka fè yo gras, se lè sa a yo jwenn delivrans y ap chache a. Se lè sa a yo ka byen ak Bondye ankò. Se travay sa menm Jezikri te vin fè.

Rive la, Pòl di ki kalite bè lavi n ap mennen ansanm ak Jezikri lè nou asepte sa Bondye fè pou nou. Moun ki mete konfyans yo konsa nan Bondye pa nan kont ak Bondye ankò. Yo menm ak Bondye vin tankou papa ak pitit. Granmesi Lespri Bondye a, yo delivre anba chenn peche ak anba pouvwa lanmò. Pran chapit senk lan rive  chapit uit, Pòl esplike rezon ki fè Bondye te  bay lalwa sou ansyen kontra a, ak ki jan pouvwa Lespri Bondye  a ap travay nan lavi moun ki kwè nan Kris la. Daprè li, nan plan travay Bondye pou tout  moun lan, si jwif yo rive  voye Jezi jete , sa tou  antre nan plan travay Bondye a. Se pòt favè Bondye a te ka louvri pou tout rès moun sou latè na Jezikri. Men, sa pa vle di Bondye pa renmen jwif yo ankò. Li toujou renmen yo. Se konsa li kwè yon lè jwif yo va  sispann  kenbe tèt ak Bondye, yo menm tou y a  asepte Jezikri.

Pou fini, yon kretyen fèt pou viv jan Bondye montre l la nan Jezikri. Poto mitan lavi a se renmen. Nan tout sa yon kretyen ap fè, se pou l moutre jan  li renmen tout moun ak renemn ki sòti nan Lespri Bondye  a.

Nan finisman lèt la, li voye mesay pou kèk moun li konnen, epi  li bay de twa pawòl pou fè lwanj Bondye. 

Sous: Bib la, Edisyon 1999

TOTAL: 24 liv | 200 chapit | 6376 vèsè

Depi 1 fevriye 2021
Senmak, Ayiti
Telefòn: (509) 4075-6250
Imèl: etidbiblikpesonel@gmail.com 
Blog: www.etidbiblikpesonel.blogspot.com