ENTWO Matye

 

OBJEKTIF : Pwouve Jezi se Mesi, Moun Bondye te pwomèt la, Wa ki la pou tout tan an. 

KONTEKS : Matye te yon kolektè enpo jwif ki vin disip Jezi. Levanjil li a ratache Ansyen Kontra a ak Nouvo a nan aksan li mete sou akonplisman pwofesi yo. 

⦁ Jezikri, se wa

⦁ Mesi a, Nonm ki te gen pou vini an

⦁ Wayòm Bondye a

⦁ Ansèyman

⦁ Rezireksyon

Chak moun ki ekri bòn Nouvèl la te ekri l ak lide pa yo. Nan liv Bòn nouvèl Matye ekri a nou jwenn Jezikri kanpe tankou wa Bondye voye pou delivre tout moun sou latè, jan Bondye te fè pèp li a pwomès la nan tan Ansyen Kontra a.

Istwa a byen ranje nan liv la. Pou konmanse li bay lis non zansèt Jezi yo depi Adan rive sou Jozèf. Lèfini, li rakonte ki jan Jezi te fèt. Li sote  trant lanne, epi li pran travay Jan Batis nan dezè a bò larivyè Jouden. Lè sa a li tounen sou Jezi, li tanmen rakonte jan Jan Batis te batize l, jan Satan te sonde l. Apre sa li rakonte travay  Jezi nan zòn Galile, jan li t ap moutre moun anpil bagay, jan li t ap geri maladi, jouk li tounen yon dènye fwa lavil Jerizalèm. Matye pran depi chapit venteyen an rive chapit venntwit lan pou l rakonte sa ki pase nan dènye senmenn lavi Jezi a lavil Jerizalèm, jan yo kloure l sou kwa a, jan li leve sòti vivan ak jan li fè patizan l yo wè l divès fwa. Liv la fini ak lòd Jezi bay disip li yo pou yo ale toupatou sou latè pou fè patizan pou li.

Nan liv Bòn Nouvèl sa a Matye kanpe Jezi tankou yon mèt kifò epi ki gen otorite pou li esplike lalwa Bondye a, pou li moutre moun anpil bagay sou gouvènman Bondye a. Se konsa li ranmase divès pawòl ak divès diskou Jezi te fè, li fè senk gwo kòzman ak yo. 

⦁ Premye kòzman an se sèmon li bay sou mòn lan kote li di kijan moun k’ap viv anba gouvènman Bondye ki nan syèl la gen pou mennen bak yo, ki kalite  moun yo ye, ki devwa yo, ki obligasyon yo, ki privilèj yo, ak sa kap tann yo. 

⦁ Nan dezyèm kòzman an Matye mete tout lòd Jezi ap bay douz apòt li yo sou travay li voye yo al fè. 

⦁ Twazyèm kòzman an se yon bann pawoli sou gouvènman Bondye ki nan syèl la. 

⦁ Nan katriyèm kòzman an Jezi moutre nou sa sa vle di lè yon moun di se patizan Kris la li ye. 

⦁ Senkyèm kòzman an se sou jan sa kap pase kounyeya sou latè gen pou fini anvan pou Bondye vin chita  gouvènman l lan nèt ale. 

Bib la, Edisyon 1999

 TOTAL: 8 liv | 44 chapit | 1520 vèsè

Depi 1 fevriye 2021
Senmak, Ayiti
Telefòn: (509) 4075-6250
Imèl: etidbiblikpesonel@gmail.com 
Blog: www.etidbiblikpesonel.blogspot.com