ENTWO Filemon

 

 Otè | Dat | Kote

Apot Pòl te ekri liv Filemon an lane 60 yo. Lè sa, li te nan prizon pou premye fwa lavil Wòm. Se nan menm peryòd la li te ekri Efezyen ak Kolosyen.

⦁ Pou kilès?

Pou Filemon, yon kretyen rich, Afya ak Achip.

⦁ Objektif lèt sa a

Konvenk Filemon pou li padone Onezim, yon ansyen esklav li, epi aksepte li paske se frè li nan lafwa li vin ye.  

⦁ Kontèks lèt la

Yon lè Pòl te lavil Wòm yo te ba li kay li pou prizon. Lè sa a te gen yon esklav yo te rele Onezim ki te sove kite kay mèt li epi li te al kache lavil Wòm. Nou pa konn kijan li rive pran kontak ak Pòl. Men, se konsa li vin konnen bòn nouvèl la, li mete konfyans li nan Kris la, epi li rete ap sèvi Pòl. Onezim te yon gwo konkou pou Pòl lè sa a. Men, daprè lalwa lavil Wòm lan, se devwa Pòl pou li te voye esklav la tounen al jwenn mèt li. Mèt Onezim nan te rele Filemon. Se te yon kretyen tou, yon grannèg ki genlè te manm legliz lavil Kolòs, yon moun Pòl te byen avè l (BIB LA, paj 305).

Lè ou li tout lèt la, w ap dekouvri diferans ant lwa yon sosyete tankou Ayiti ak lwa Bondye a ki pi wo pase tout lwa ki sou latè. Sa vle di, kretyen yo pa dwe inyore lwa peyi yo pandan y ap pratike lwa Bondye a. Yon timoun gen paran li ki responsab li, yon madanm gen mari li, ou pa ka vyole dwa yo pou enpoze prensip biblik. Ou dwe fè sa nan respè. Ebyen, se konsa Pòl te mande pou Filemon resevwa Onezim tankou yon frè e non tankou esklav. 

⦁ Vèsè kle

《Ou pa janm konnen si Onezim pa t kite ou pou yon tan, pou ou te ka jwenn li ankò pou tout tan. Paske, se pa tankou yon senp esklav ou jwenn li ankò. Koulye a, li plis pase yon esklav pou ou: se yon frè li ye pou nou nan Kris la, yon frè mwen renmen anpil. Men, ou menm ou dwe renmen li pi plis pase m ankò. Pa sèlman tankou nenpòt ki moun, men tankou yon frè nan Seyè a.》(15-16)

⦁ Tèm ki devlope nan lèt la

Padon, baryè rasyal, sosyal, ekonomik ak politik.

 TOTAL: 4 liv | 4 chapit |78 vèsè

Depi 1 fevriye 2021
Senmak, Ayiti
Telefòn: (509) 4075-6250
Imèl: etidbiblikpesonel@gmail.com 
Blog: www.etidbiblikpesonel.blogspot.com